စိတ်ချရတဲ့ Multicast

အချက်အလက်တွေကို Multicast အသုံးပြုပြီးဖြန့်ဝေတဲ့အခါ UDP ကိုမသုံးမဖြစ်သုံးရပါတယ်။ Multicast ဆိုတာ ကွန်ပျူတာ တစ်ခုကအချက်အလက်ပို့ပေးပြီး ကွန်ပျူတာအများကြီးက လက်ခံတဲ့ application တွေမှာပါတယ်။ ဥပမာ တစ်ခုကတော့ စတော့ဈေးကွက်ကဒိုင်တွေ ပေါက်ဈေး၊ ရောင်းဈေး၊ ၀ယ်ဈေး အချက်အလက်တွေကို ပွဲစား ကုမ္ပဏီတွေကို ဖြန့်ဝေပေးတဲ့အခါ သုံးလေ့ရှိပါတယ်။

UDP ရဲ့ သဘာဝက အချက်အလက်ကို ၀န်နည်းနည်းနဲ့ မြန်မြန်ပို့ပေးနိုင်ဖို့ဖြစ်ပါတယ်။ လက်ခံသူကရသည်၊ မရသည် ပြန်စစ်ဆေးတဲ့ စံနစ်မပါဝင်ပါဘူး။ ဒါကြောင့် UDP နဲ့ အချက်အလက်ပို့ပေးရင် စိတ်မချရဘူးလို့ ပြောနိုင်ပါတယ်။ (စိတ်ချစေချင်ရင်တော့ TCP ကိုသုံးပါ။ ဒါပေမယ့် ၀န်ပိုကြီးပါတယ်။ TCP ကို Multcast မှာသုံးလို့လဲမရပါဘူး။)

ငွေကြေးအချက်အလက်တွေကို Multicast/UDP သုံးပြီးဖြန့်ဝေပေးတဲ့အခါ လက်ခံရသူတွေက အချက်အလက်တွေကို မရခဲ့ရင် ပြန်တောင်းဖို့အတွက် Multicast မှာရော၊ UDP မှာပါ လုပ်ပေးနိုင်တဲ့ နည်းလမ်းမပါဝင်ပါဘူး။ ဒီလို စိတ်ချရတဲ့ Multicast ပရိုဂရမ်မျိုးရေးဖို့အတွက် Transport Layer နဲ့ Application Layer ကြားထဲက messaging middleware လိုအပ်ပါတယ်။

လောလောဆယ် ဈေးကွက်မှာ အအောင်မြင်ဆုံး သူ ၂ ဦးကတော့
၁၊ Tibco နဲ့
၂၊ 29West
တို့ဖြစ်ပါတယ်။

ဒီကုမ္ပဏီတွေက ထုတ်လုပ်တဲ့ messaging middleware က Java, C, C++, C# (.NET) စတဲ့ လူသုံးများတဲ့ ပရိုဂရမ်ဘာသာစကားတွေကို အထောက်အပံ့ပေးပါတယ်။ Tibco (သို့) 29West ကို ကျွမ်းကျွမ်းကျင်ကျင် ရေးနိုင်တဲ့ ပရိုဂရမ်မာတွေဆို လခကောင်းကောင်းနဲ့ အလုပ်လွယ်လွယ်ရနိုင်ပါတယ်။ အထူးသဖြင့် ဘဏ်တွေ၊ စတော့ဈေးကွက်ဒိုင်တွေ၊ စတော့/ငွေကြေးပွဲစား လုပ်ငန်းတွေက ခေါ်လေ့ရှိပါတယ်။

Network Engineer ဒီ middleware တွေက စိတ်မချရတဲ့ Multcast/UDP ကိုစိတ်ချရအောင် ၀န်ဆောင် ပေးတယ်ဆိုတာ သိထားဖို့လိုပါတယ်။
ပို့ပေးတဲ့ကွန်ပျူတာ (sender) က အချက်အလက်တွေကို ပို့ပေးတဲ့အပြင် မိတ္တူပွားပြီး ခဏသိမ်းထားပေးပါတယ်။
လက်ခံတဲ့ကွန်ပျူတာ (receiver) ကအချက်အလက်တချို့ကို မရလိုက်ရင် ပြန်ပို့ပေးဖို့တောင်းပါတယ်။ ဒီလိုတောင်းတာကို ပို့ပေးတဲ့ကွန်ပျူတာရဲ့ မိတ္တူထဲမှာ ရှိသေးရင်ပြန်ပို့ပေးပါတယ်။
ပို့ပေးတဲ့ကွန်ပျူတာက မိတ္တူ ကိုဘယ်လောက်ကြာကြာသိမ်းထားမယ်ဆိုတာ လိုအပ်သလိုသတ်မှတ်နိုင်ပါတယ်။

လက်ခံတဲ့ကွန်ပျူတာတွေက ခဏခဏ ပြန်တောင်းနေရင်၊ ပို့ပေးသူကလည်း ပုံမှန်အလုပ်ကိုမလုပ်နိုင်ဘဲ ပို့ပေးပြီးသားအချက်အလက်ကို ပြန်ပြန်ပို့ပေးနေရပါလိမ့်မယ်။ မေးခွန်းထူတဲ့ ကျောင်းသားတွေများတဲ့စာသင်ခန်းမှာ အထပ်ထပ်ရှင်းပြနေရလို့ သင်ခန်းစာခရီးမရောက်သလို ဆန်ဆန်ပေါ့။

ဒီလိုဖြစ်တာ ပိုဆိုးဆိုးလာရင် "network ပြသနာ တစ်ခုခုဖြစ်နေပြီ" ဆိုပြီး ပျော်ပွဲ ရွှင်ပွဲ စတင်ပါတော့တယ်။