- နိုဝင်ဘာ ၁၂ ရက် ၊ ၂၀၀၈ (ဗုဒ္ဓဟူးနေ့) - မီးဒ်ရေကန် ၊ ဂရန်းကင်ညွန်
မနက် ၈ နာရီလေယာဉ်နဲ့ ဆန်ဖရန်စစ်စကိုကထွက်ခဲ့တာ လပ်စ်ဗေးဂပ်စ် ကို မနက် ၉ နာရီခွဲလောက်မှာ ရောက်ပါတယ်။ အငှားကား ၀င်ယူ၊ မနက်စာ စားပြီး ဗေးဂပ်စ်ကထွက်တော့ မနက် ၁၁ နာရီကျော်လောက်ရှိပါပြီ။ ဗေးဂပ်စ်မြို့ပြင်က မိုင် ၃၀ ခန့်မှာရှိတဲ့ Lake Meade ကို နေ့လည် ၁ နာရီလောက် ၀င်ကြည့်ခဲ့ပါတယ်။ Lake Meade က အမေရိကန်နိုင်ငံအတွင်း လူဆောက်တဲ့ ရေကန်တွေထဲမှာ အကြီးဆုံးဖြစ်တယ်လို့ ဆိုပါတယ်။
Lake Meade ရဲ့ဘေးမှာ ပတ်ဆောက်ထားတဲ့ မီးရထားလမ်းကြောင်းဟောင်း မှာ ၂ မိုင်လောက် လမ်းရှောက်ခဲ့ပါတယ်။ အဲဒီမီးရထားလမ်းကို ၁၉၃၁ က စတင်ဆောက်လုပ်ခဲ့ပြီး၊ ၁၉၆၁ ခုနှစ်မှာ အသုံးပြုတာ ရပ်စဲခဲ့တယ်လို့ဆိုပါတယ်။ အနီးအနာမှာရှိတဲ့ Boulder City ကနေ ဟူးဗား ရေကာတာ (Hoover Dam) ဆီကို ဆောက်လုပ်ရေး ကုန်ပစ္စည်းတွေ တင်ပြေးခဲ့တဲ့ ရထားတွေအတွက်လို့သိရပါတယ်။
Lake Meade ကထွက်ပြီး ၅ မိနစ်လောက်ကြာတော့ Hoover Dam ကိုရောက်ပါတယ်။ Grand Canyon ကို နည်းနည်းစောရောက်ချင်တာကြောင့် ၀င်မကြည့်တော့ဘဲ ဘေးကသာဖြတ်မောင်းခဲ့ပါတယ်။ ရေကာတာနားက လမ်းမှာ ရဲတွေက ကားတိုင်းကို စစ်ဆေးတာကြောင့် ဖြေးဖြေးသာမောင်းလို့ရပါတယ်။ လမ်းကလည်း တောင်တက်ဖြစ်တဲ့အပြင် အလိမ်အကောက်တွေများပါတယ်။ ရေကာတာကို လာရောက်လည်ပတ်သူတွေ တော်တော်များတာ သတိပြုမိပါတယ်။ ဒီရေကာတာရဲ့ဘေးနားလေးမှာ Nevada ပြည်နယ်နဲ့၊ Arizona ပြည်နယ်ကိုဖြတ်တဲ့ လမ်းကြောင်းရှိပြီး၊ အဲဒီနေရာကိုဖြတ်တာနဲ့ တစ်နာရီကွာသွားပါတယ်။ Nevada က Pacific Timezone ဖြစ်ပြီး၊ Arizona က Mountain Time ဖြစ်ပါတယ်။ အဲဒီနားမှာ ခြေတစ်လှမ်း၊ ဘီးတလှိမ့်လောက်ကွာတဲ့ အချိန်တစ်နာရီ ကွာတယ်လို့ဆိုနိုင်ပါတယ်။ Hoover Dam ဆိုတာ မနှစ်က နာမည်ကြီးခဲ့တဲ့ Transformers ရုပ်ရှင်ထဲမှာ လူဆိုးစက်ရုပ် Megatron ကို အစိုးရက သိမ်းထားတဲ့နေရာဖြစ်ပါတယ်။
Hoover Dam ကနေ လမ်းမ ၉၃ (Route 93) ပေါ်မှာ ၇၅ မိုင်လောက်မောင်းပြီးတဲ့အခါ Route-93 နဲ့ ပြည်နယ်ဖြတ်လမ်းမကြီး နံပါတ် ၄၀ (Interstate 40) တို့ဆုံတဲ့ Kingman မြို့လေးကိုရောက်ပါတယ်။ Kingman ဟာ ၁၉၃၀ ခုနှစ်များဆီက နာမည်ကြီး လူသုံးအရမ်းများခဲ့တဲ့ လမ်းမ ၆၆ (Route 66) ရဲ့ လမ်းဆုံးဖြစ်ပါတယ်။ ၁၉၃၀ ခုနှစ်များအစပိုင်းက စခဲ့တဲ့ စီးပွားပျက်ကပ် အချိန်တုံးက အမေရိကရဲ့ အရှေ.ဘက်ကမ်းကလူတွေ အလုပ်ရှာဖို့ အိမ်ယာကိုပြစ်ပြီး ရေကြည်ရာ မျက်နုရာ Route 66 အတိုင်း အနောက်ဘက်ကို လာခဲ့ကြတဲ့အတွက် အရမ်းစည်ကားခဲ့တယ်လို့ မှတ်သားခဲ့ဘူးပါတယ်။ ၂၀၀၆ ခုနှစ်က နာမည်ကြီးခဲ့တဲ့ Cars ကာတွန်းကားဟာ Route 66 ကိုနောက်ခံထားတဲ့ ရုပ်ရှင်ဖြစ်ပါတယ်။
Grand Canyon ကိုရောက်တော့ ည ၇ နာရီကျော် လောက်ရှိပြီး၊ မိုးစုတ်စုတ်ချုပ်နေပါပြီ။ အဲဒိနေ့က ကဆုန်လပြည့်ညမတိုင်ခင် တရက်ဖြစ်ပြီး တိမ်အတော်အသင့်ကင်းတဲ့ညဖြစ်လို့ လ အလင်းရောင်နဲ့ ညမှောင်မှောင်မှာ ပတ်ဝန်းကျင်ကို ကောင်းကောင်းမြင်ရပါတယ်။ အပူချိန်ကတော့ သုည အောက်နည်းနည်းလျော့မယ်ထင်ပါတယ်။ ဟိုတယ်မှာ ပစ္စည်းချပြီးတာနဲ့ Grand Canyon ကို လရောင်အောက်မှာမြင်ရအောင် ပြန်ထွက်ခဲ့ကြပါတယ်။
ဟိုတယ်ကနေ ၅ မိုင်လောက်မောင်းပြီးတော့ Grand Canyon ရဲ့ View Point တနေရာမှာ ကားရပ်ပြီး ချောက်ကြီးရဲ့ နဘေးမှာ သွားငေးခဲ့ကြပါတယ်။ လရောင်အောက်မှာ ပေ ၆၀၀၀ ကျော်နက်တဲ့ ချောက်ကြီးဟာ အပ်ကျသံကြားရအောင် ငြိမ်သက်နေပါတယ်။ ဟိုးဝေေ၀း ချောက်ထဲတနေရာမှာ မီးရောင် လဲ့လဲ့ကို လှမ်းမြင်ရပါတယ်။ ဒေသခံ လူနီရိုင်းတွေဘဲလား၊ ညစခန်းထွက်ကြတဲ့ ခရီးသယ်တွေဘဲလားတော့ မပြောတတ်ပါဘူး။ လူအုပ်စုကောင်းကောင်းနဲ့ ချောက်ထဲကို ညအိပ်ခရီးထွက်ဖို့ တချိန်ချိန်မှာ စီစဉ်ရအောင်လို့ ကျွန်တော့အကိုနဲ့ ပြောရင်စိတ်ကူးယဉ်ကြည့်မိပါသေးတယ်။ မြင်ရခဲတဲ့၊ ကြည့်လို့မ၀နိုင်တဲ့ လရောင်အောက်က ချောက်နက်နက်ကြီးကို ဓါတ်ပုံရိုက်ဖို့ အတန်အတန်ကြိုးစားပေမယ့် ဓါတ်ပုံပညာဥာဏ် ချို့တဲ့တာကြောင့် ပုံမဲမဲတွေသာ ထွက်လာပါတယ်။ အေးတာလဲ အရမ်းအေး၊ ဓါတ်ခဲတ၀က်ကျော်လဲကုန်သွားတာကြောင့် ၁ နာရီလောက် ငေးမောပြီးတဲ့အခါမှာ ဟိုတယ်ကို ပြန်ခဲ့ကြပါတယ်။ အသက် ၆၀ ကျော်ပြီးဖြစ်တဲ့ ကျွန်တော့အမေ ကျွန်တော်တို့နဲ့အပြိုင် အအေးထဲမှာ လိုက်နေပြီး နည်းနည်းမှ နှာစေး ခေါင်းကိုက်မဖြစ်ခဲ့ပါဘူး။
Post a Comment