အမေရိကသမ္မတအသစ်

နောက်တစ်ပတ် ဗုဒ္ဓဟူးနေ့ (နိုဝင်ဘာလ ၅ ရက်) ဆိုရင်အမေရိကသမ္မတအသစ် ဘယ်သူဖြစ်မလဲဆိုတာသိရတော့မယ်။ နောက်ဆုံးစစ်တမ်းတွေရဲ့အခြေအနေအရဆိုရင်တော့ အိုဘားမားက နိုင်တော့မယ်ထင်ပါတယ်။

မက်ကိန်းရှုံးခဲ့ရင် အဓိကအကြောင်းကတော့ လက်ရှိသမ္မတ ဂျော့ဘုရှ် နဲ့သူ့ရဲ့ ရီပတ်ဘလစ်ကန် ပါတီကို အမြင်ကပ်တဲ့အတွက်ကြောင့် ဖြစ်တယ်လို့ထင်ပါတယ်။ ၂၀၀၁ ခုနှစ်၊ စက်တင်ဘာ ၁၁ အရေးအခင်းဖြစ်ပြီးခါစမှာ အမေရိကန်ကို နိုင်ငံတကာက စိတ်မကောင်းဖြစ်တဲ့အပြင်၊ လိုအပ်တဲ့အကူအညီပေးချင်စိတ် ရှိခဲ့ပါတယ်။ ၇ နှစ်ကြာပြီးတဲ့အခါမှာ သမ္မတရဲ့ မတော်တရော် အကြိမ်ကြိမ် လုပ်တာတွေကြောင့် ဂျော့ဘုရ်ှဟာ ပြည်တွင်းရော၊ ပြည်ပမှာပါ လူကြိုက်အနည်းဆုံးသမ္မတ ဖြစ်နေပါတယ်။

အီရတ်စစ်ပွဲ
မက်ကိန်းနိုင်ခဲ့ရင် အီရတ်မှာ အမေရိကန်စစ်တပ်တွေ မပြီးနိုင်မစီးနိုင်တိုက်ခိုက်နေကြရပါမယ်။ မက်ကိန်းက တပ်တွေပြန်လာရရင် စစ်ရှုံးတာဖြစ်တယ်လို့မြင်ပါတယ်။ အမေရိကန်ပြည်သူအများစုကတော့ ပိုက်ဆံကုန်တာလည်းတရားလွန်၊ အမေရိကန်တွေလည်းသေ၊ စက်တင်ဘာ ၁၁ နဲ့မဆီမဆိုင်တဲ့ အီရတ်စစ်ပွဲကို မြန်မြန်ရပ်ချင်နေကြပြီလို့ ကျွန်တော်ထင်ပါတယ်။


စီးပွားရေး
ဒီပြသနာကိုတော့ မက်ကိန်းရော၊ အိုဘားမားပါ ဘယ်လိုဖြေရှင်းမယ်ဆိုတဲ့ အဖြေရှိပုံမပေါ်ပါဘူး။
ဒီမေးခွန်းကိုမေးရင် တစ်ယောက်နဲ့တစ်ယောက် အပြန်အလှန် လက်ညှိုးထိုးကြတော့တာပါဘဲ။
မက်ကိန်းက အခွန်ရှော့ကောက်ပြီး အိုဘားမားက အခွန်တိုးကောက်မဲ့သဘောရှိပါတယ်။

အိုဘားမားအလိုအရတော့ တစ်နှစ်ဝင်ငွေ ဒေါ်လာ ၂၅၀၀၀၀ (နှစ်သိန်းခွဲ) ရှိတဲ့သူမှ အခွန်တိုးမှာဖြစ်တဲ့အတွက် အမေရိကန်မှာရှိတဲ့ လူဦးရေရဲ့ ၉၅% က အခွန်လျော့သွား၊ မတိုးသွားတာဘဲရှိမယ်လို့ဆိုပါတယ်။

မက်ကိန်းကတော့ အမေရိကန်လူဦးရေ ၄၀% လောက်ကအခွန်လုံးလုံးမပေးတဲ့အတွက်ကြောင့် အိုဘားမားရဲ့ ၉၅% ဆိုတဲ့ကိန်းဂဏန်းက မှားနေတယ်၊ တကယ်တန်းအလုပ်လုပ်တဲ့လူတွေက အခွန်ပိုပေး၊ အဲဒီအခွန်ငွေကို အစိုးရကဆုံးဖြတ်ပြီး ၀င်ငွေနည်းသူ၊ အလုပ်မရှိသူတွေကို ဝေငှပေးသွားမယ် - "wealth distribution" လုပ်သွားမယ်။ ဒါဟာ ကမ္ဘာပေါ်မှာ ဆိုရှယ်လစ်နိုင်ငံတွေကလုပ်တဲ့နည်းဖြစ်တယ် လို့ဆိုပါတယ်။

အိုဘားမားဘက်ကလည်း မက်ကိန်းသမ္မတဖြစ်ရင် ချမ်းသာတဲ့သူကပိုချမ်းသာ၊ ဆင်းရဲတဲ့သူကပိုဆင်းရဲ - ဒီလိုဖြစ်အောင် မက်ကိန်းဗဟိုအစိုးရရဲ့ အခွန်ဥပဒေက ပန့်ပိုးပေးလိမ့်မယ်လို့ဆိုပါတယ်။


ကျန်းမာရေး
အမေရိကမှာ ဆေးဖိုးဝါးခ တရားလွန်ဈေးကြီးပါတယ်။ ဆေးဝါးကုမ္မဏီတွေကဈေးတွေမတာရားမြှင့်၊ ကျန်းမာရေး အာမခံကုမ္မဏီတွေက ကြားထဲက လှည့်ပတ်တောင်းနဲ့ပေါ့။
မက်ကိန်းရဲ့ဖြေရှင်းမဲ့နည်းကတော့ ကျန်းမာရေးအတွက်တစ်နှစ်ကို ဒေါ်လာ ၅၀၀၀ အခွန်ထဲကလျော့ပေးပြီး။ အဲဒီပိုက်ဆံကို လိုသလို သုံးပေါ့လို့ ဆိုပါတယ်။ ကျွန်တော့အမြင်တော့ ၅၀၀၀ ဆိုတာ ဘာမှခံမယ်မထင်ပါဘူး။ အခန့်မသင့်လို့ဆေးရုံ ၁ ပတ်လောက်တက်လိုက်ရင် ၅၀၀၀ ဆိုတာ တခါထည်း ပလုံသွားမှာပါ။
အိုဘားမားကတော့ အလုပ်ရှင်တွေက အလုပ်သမားတွေကိုမရှိမဖြစ် ကျန်းမာရေးအာမခံဝယ်ပေးဖို့ (မ၀ယ်ပေးရင် ဒဏ်တပ်ဖို့လို့)၊ အာမခံကုမ္မဏီတွေက နေမကောင်းသူတွေကို မငြင်းပယ်ဖို့၊ ဈေးသက်သာအောင် ဆေးဝါးကုမ္မဏီတွေ၊ အာမခံကုမ္မဏီတွေနဲ့ ညှိုနှိုင်း ဖို့လို့ - စတာတွေပါဝင်ပါတယ်။ အပြောကောင်းပေမယ့် တကယ်လုပ်နိုင်ပါ့မလားဆိုတာကတော့ စဉ်းစားစရာပါ။


အခြားအရေးကြီးတဲ့အချက်တွေကတော့ -
၁၊ အရှေ.အလယ်ပိုင်းက လောင်စာဆီကိုအကြီးအကြယ်မှီပြုနေတာကိုဖြေရှင်းဖို့ (အီသနော၊ နှုကလီးယာစွမ်းအင်၊ မီးသွေး၊ ဟိုက်ဒရိုဂျင်ဆဲလ်၊ လျပ်စစ် - တစ်ခုခုကိုပြောင်းသုံးဖို့ပေါ့)
၂၊ ပတ်ဝန်းကျင်သန့်ရှင်းရေး
၃၊ ပညာရေး
၎၊ သမ္မတနဲ့ ဒုတိယသမ္မတတို့ရဲ့ အလုပ်အတွေ့အကြုံ
၅၊ နိုင်ငံတကာအတွေ့အကြုံ
၆၊ နိုင်ငံ ကာကွယ်ရွေး
စတာတွေဖြစ်ပါတယ်။

တီးဝိုင်း

နယူးယောက်မှာနေတဲ့အတွက် မကြာမကြာ ကျွန်တော့အိမ်ကို ဧည့်သည်လာလေ့ရှိပါတယ်။ အရင်တစ်ပတ်က (အောက်တိုဘာ ၁၈ ရက်နေ့) နယူးယောက်မှာ စိုင်းထီးဆိုင် အမှတ်တရတီးဝိုင်းကျင်းပသွားပါတယ်။ ကျွန်တော့ အကို ကိုချစ်ခိုင်က အဲဒီပွဲမှာ keyboard တီးပါတယ်။ သူနဲ့ အရင်စိုင်းထီးဆိုင်ရဲ့ "သဘာဝရင်သွေးငယ်" မှာ ဂစ်တာတီးတဲ့ ကိုဘုံးဘုံတို့ ကျွန်တော့အခန်းမှာ ၃ ည စတည်းချသွားကြပါတယ်။
သီချင်းတိုက်ကြတဲ့ ၂ ညလောက်တော့သွားပြီး နားထောင်ဖြစ်ပါတယ်။ မမေဆွိ၊ မမီမီဝင်းဖေ နဲ့ မရတနာဦး - တို့ကအဓိကဆိုကြတာ ဖြစ်ပါတယ်။ စောဘွဲ့မှူးရဲ့သား ဘွဲ့လေးလည်းလာပြီးဂစ်တာတီးသွားပါတယ်။
၁၈ ရက်နေ့တီးဝိုင်းစတဲ့ညက တီးဝိုင်းရဲ့စက်အသံတွေက တော်တော်ကောင်းပါတယ် (သိပ်သိလုိ့တော့မဟုတ်ပါဘူး၊ စိတ်ထဲထင်တာပြောတာပါ)။ လူသိပ်များများလာတာမတွေ့မိဘူး။ တီးဝိုင်းက ၆ နာရီခွဲလောက်မှာစတာ၊ ကျွန်တော်လည်း ကိစ္စတစ်ခုရှိတာကြောင့် ၇ နာရီကြော်ကြော်မှာ ထွက်ခဲ့ရတာမို့ နောက်ပိုင်းလူများလာသလားတော့မပြောတတ်ဖူး။


အိပ်ချင်မူးတူး ကိုချစ်ခိုင်နဲ့ သူရဲ့ တူရိယာများ


တီးတဲ့သူကတီး ၊ ဆိုတဲ့သူကဆို

စီးပွားပျက်ကပ် ၂.၀ ဖြစ်မှာလား (၂)?

လောလောဆယ်ကမ္ဘာအနှံကိုပြန့်ပွားမလိုဖြစ်နေတဲ့ စီးပွားရေးကမောက်ကမဖြစ်မှုကြီးဘယ်ကစတာလဲ - ဆိုတာကိုပညာရှင်တွေကအမျိုးမျိုးသုံးသပ်ကြသလို၊ နိုင်ငံရေးသမားတွေကလည်း တစ်ရောက်နဲ့တစ်ရောက်လက်ညှိးထိုးကြနဲ့ပေါ့။
ကျွန်တော်လည်းဖတ်ဖူးသလောက်၊ မှတ်ဖူးသလောက်နဲ့ ထင်ရာမြင်ရာဆွေးနွေးသွားပါမယ်။

၁၉၈၇ နှစ်က အော်လီဗာစတုန်းရိုက်ပြီး၊ မိုက်ကယ်ဒေါက်ဂလပ်စ် နဲ့ ချာလီရှီးန် တို့သရုပ်ဆောင်တဲ့ "Wall Street" ရုပ်ရှင်ထဲက ဇာတ်ကောင် ဂေါ်ဒွန်ဂက်ကို (မိုက်ကယ်ဒေါက်ဂလပ်) ပြောတဲ့စကားက အခုဖြစ်နေတဲ့ပြသနာတွေရအစလို့ ကျွန်တော်ထင်ပါတယ်။

"လောဘ - ဒိထက်ကောင်းတဲ့စကားလုံးလဲရှာလို့မရတဲ့အတွက် - ဆိုတာ ကောင်းတယ်"
"Greed, for lack of better word, is good"


၂၀၀၀ ခုနှစ်လောက်ကစပြီး အမေရိကမှာ အိမ်ဈေးတွေတက်ပြီးရင်းတက်နေတာ ၂၀၀၆ ခုနှစ်ကုန်လောက်အထိပါဘဲ။ ၁ နှစ်လောက်အတွင်းမှာကို အိမ်ဈေးတွေက ၂ ဆလောက်တက်သွားတဲ့နေရာတွေရှိခဲ့ပါတယ်။ ကိုယ့်အိမ်နီးနားခြင်း၊ ဆွေမျိုး၊ မိတ်ဆွေ၊ သူငယ်ချင်းတွေ အိမ်ဝယ်ရောင်းလုပ်ပြီး အကြီးအကြယ်မြတ်သွားတယ်ဆိုတာကို နေ့စဉ်လိုလိုကြားနေရပါတယ်။ ရေဒီယိုတို့၊ တယ်လီဗီးရှင်းတို့မှာလည်း အိမ်ဝယ်သင့်တဲ့အကြောင်း၊ အသစ်ဆောက်ထားတဲ့အိမ်တွေအကြောင်း ကြော်ငြာတွေဆိုတာ အမြဲမပြတ် မြင်နေကြားနေခဲ့ရပါတယ်။

အိမ်ကိုဝယ်ရောင်းလုပ်ပြီးအမြတ်လိုချင်တယ်ဆိုတာ ပိုက်ဆံရှိတာ၊ မရှိတာအသာထားလို့ လူတိုင်းလိုလိုလုပ်ချင်ခဲ့ကြပါတယ်။ ငွေကို လွယ်လွယ်၊ မြန်မြန်၊ များများရမှာဆိုတော့ ဘာမကောင်းစရာရှိသလဲပေါ့။ အိမ်ဝယ်မယ်ဆိုတာ သေချာပြီးတဲ့နောက်ဘယ်လိုအိမ်ကို ၀ယ်မယ်ဆိုတာဆုံးဖြတ်ရမဲ့အချန်ရောက်လာပါတယ်။ ၀ယ်ရောင်းလုပ်မှာဆိုတော့ ဈေးကြီးကြီးအိမ် ၀ယ်လေလေ အမြတ်များများရလေလေဘဲပေါ့။ ဒါ့အပြင် ကိုယ့်အိမ်နီးနာခြင်းက အိပ်ခန်း ၄ ခန်းနဲ့၊ ဧက၀က်မြေပါတဲ့အိမ်ကိုဝယ်တာဆိုတော့ - အနည်းဆုံးအိပ်ခန်း ၅ ခန်းနဲ့ ရေကူးကန်ပါတဲ့အိမ်ကိုဝယ်မှဖြစ်တော့မှာပေါ့။

ကြိုက်တဲ့အိမ်လဲတွေ့ပါပြီ။ ပြသနာတစ်ခုဘဲကျန်ပါတော့တယ်။ အိမ်ဝယ်ဖို့ပိုက်ဆံပေါ့။ အိမ်က ဒေါ်လာ ၇ သိန်းတန်တယ်၊ ဒါပေမယ့် ကိုယ့်လက်ထဲမှာ ဒေါ်လာ ၂ သောင်းလောက်ဘဲရှိတယ်။ အလုပ်ကလဲ တစ်လမှ ဒေါ်လာ ၃၀၀၀ လောက်ရတယ်။ ဒီပြသနာကို အစိုးရနဲ့ ဘဏ်တွေက ဖြေရှင်းပြီးသားပေါ့။

၁၉၉၀ ခုနှစ်များအလယ်ပိုင်း သမ္မတ ဘီလ်ကလင်တန်လက်ထက်၊ ဗဟိုဘဏ်ဥက္ကဌ အလန်ဂရင်းစပန် လက်ထက်မှာ ၀င်ငွေမကောင်းတဲ့သူတွေ၊ နိုင်ငံခြားကလာရောက်အလုပ်လုပ်တဲ့သူတွေ အိမ်အလွယ်တကူဝယ်နိုင်အောင်ဆိုပြီး အိမ်ဝယ်ဖို့ချေးငွေ (Mortgage) နဲ့ပတ်သက်တဲ့ ဥပဒေတွေကိုပြင်ဆင်ခဲ့ပါတယ်။
အဲလိုပြင်ဆင်ခဲ့တာတွေထဲက ၃ ခုကိုပြောရရင်
၁၊ စာရွက်စာတမ်းမလိုတဲ့ချေးငွေ (no document loan) - ချေးတဲ့ငွေကိုလစဉ်ပြန်ဆပ်ဖို့အတွက် ဘယ်လိုဝင်ငွေရှိတယ်တာပြဖို့ မလိုအပ်ဘူးလို့ဥပဒေကို ပြင်ဆင်ခဲ့ပါတယ်။ အိမ်ဝယ်မယ်ဆိုရင် အချပေးငွေ (down payment) ကိုအိမ်တန်ဖိုးရဲ့ ၂၀% ထုံးစံပါ။ ဒီထက်လျော့ပေးလို့လည်းရပါတယ် - ဒါပေမယ့်လစဉ်ပေးရတာပိုများသွားတာပေါ့။ ဒီ အချပေးငွေကို ဘယ်ကရလာတယ်ဆိုတာလဲ စာရွက်စာတမ်းပြဖို့မလိုပါဘူး။

၂၊ အတိုးကိုသာပေးသောချေးငွေ (interest only loan) - အိမ်ဝယ်ပြီး ပထမ ၃ နှစ်မှာ ချေးငွေရဲ့အရင်းကိုတပြားမှ ပေးစရာမလိုဘဲ အတိုးကိုသာပြန်ဆပ်တဲ့ ချေးငွေဖြစ်ပါတယ်။ ၃ နှစ်ကြာပြီးရင်တောင်မှ အိမ်ကိုတစ်ပြားဖိုးမှ မပိုသေးဘူးပေါ့။ ဒီလိုပြောင်းတဲ့ ဥပဒေရဲ့ရည်ရွယ်ချက်ကတော့ ၀င်ငွေမကောင်းတဲ့သူတွေ လစဉ်ပေးငွေသက်သက်သာသာနဲ့ အိမ်ဝယ်နိုင်အောင်လို့ပေါ့။ အဲဒီစနစ်မှာ အခွန်နှုံးက ပုံမှန် ၁၅ နှစ်၊ နှစ် ၃၀ ချေးငွေထက် အတိုးနှုံးနည်းပါတယ်။ ပထမ ၃ နှစ် (သို့မဟုတ် ၅ နှစ်) ပြီးရင်တော့ အတိုးနှုံးပြောင်းသွားမှာပေါ့။ ဒါကို ပြောင်းလဲနိုင်သော အတိုးနှုံး (ARM - Adjustable Rate Mortgage) လို့ခေါ်ပါတယ်။

၃၊ ကိုယ်တိုင်နေတဲ့အိမ်ကို ရောင်းလို့အမြတ်ရရင် ဒေါ်လာ ၅ သိန်းအထိ အခွန်ပေးစရာမလိုဘူး။ အမေရိကမှာ ဘာအလုပ်လုပ်က ၀င်ငွေရရ ၃၅% လောက်အခွန်ပေးရပါတယ်။ အိမ်ရောင်းလို့ရတဲ့အမြတ်ကလွဲလို့လေ။

ဒီဥပဒေအပြောင်းအလွဲတွေဟာ ၀င်ငွေနည်းသူတွေ အိမ်ပိုင်ဆိုင်ခွင့်ရအောင် အားပေးဖို့ပြင်ဆင်ခဲ့တာဖြစ်ပါတယ်။ ရည်ရွယ်ချက်ကတော့ ကောင်းတယ်လို့ပြောရမလားဘဲ။ ဒီဥပဒေကို ရေးခဲ့သူတွေက - လူတွေလောဘတက်ရင် ဆင်ခြင်တုံတရား ပျောက်သွားတယ်ဆိုတာ ကိုထဲ့မစဉ်းစားခဲ့တာလား၊ လျော့တွက်ခဲ့တာလား - တစ်ခုခုပါဘဲ။

ဘဏ်တွေဘက်ကလဲ ပထမဥပဒေ နှစ်ခုလုံးတဲ့ညီတဲ့လူတွေကို ငွေချေးချင်ကြတယ်။ ဘာကြောင့်လဲဆိုတော့ အိမ်အရောင်းအ၀ယ်လုပ်တဲ့ အချိန်မှာ စာရွက်စာတမ်းကြေး၊ ၀န်ဆောင်ခ ပိုရတဲ့အပြင် အတိုးလည်းပိုရလို့ပေါ့။ ဒီလို ချေးငွေကို subprime mortgage လို့ခေါ်ပါတယ်။ Prime ဆိုတာ ဗမာလို ပြောရင် "အကောင်းစား" လို့ပြောရမလားဘဲ။ subprime ဆိုတဲ့ သိပ်မကောင်းတဲ့ (သိပ်ပြီး မယုံကြည်၊ စိတ်မချရတဲ့) ငွေချေးသူပေါ့။ တနည်းပြောရင်တော့ အကြွေးပြန်ဆပ်ဖို့ဆိုတာ သိပ်မသေချာတဲ့သူတွေမှန်း သိသိကြီးနဲ့ ငွေချေးတာပါဘဲ။

လက်ထဲမှာရှိတဲ့ ဒေါ်လာ ၂ သောင်းနဲ့ ၇ သိန်းတန်အိမ်ကိုဝယ်တဲ့အကြောင်းဆက်ပြောပါမယ်။ ၂ သောင်းဆိုတော့ အချပေးငွေ ၅% တောင်မရှိဘူးပေါ့။ ဒါကိုသိတဲ့ဘဏ်တွေက အဆင်ပြေအောင်လုပ်ပေးပါတယ်။ အကြောင်းတစ်ခုပြပြီး အိမ်ဝယ်သူကို ၅ သောင်း ပထမထုတ်ချေးလိုက်ပါတယ်။ စုစုပေါင်း ၇ သောင်းဆိုတော့ အချပေးငွေ ၁၀% ရှိသွားပြီပေါ့။ (no document loan) ဥပဒေအရ အိမ်ဝယ်သူ ပိုက်ဆံဘယ်က ရလာတယ်ဆိုတာ မစစ်ဆေးတော့ဘဲ ကျန်တဲ့ ၆ သိန်း ၃ သောင်းကို ချေးပေးလိုက်တာပေါ့။ ၀င်ငွေကလဲ တစ်လမှ ၃၀၀၀ ရှိတာဆိုတော့ "အတိုးကိုသာပေးသောချေးငွေ (interest only)" ကိုဘဲရွေးလိုက်တာပေါ့။

ပထမ ၃ နှစ်အတွင်းမှာ အိမ်ထဲကိုငွေမ၀င်လဲ အရေးမကြီးဘူးလေ။ အိမ်ဈေးက ဆက်တက်နေမှာဘဲ။ အိမ်ကြီးအိမ်ကောင်းမှာ ၁ နှစ် ၂ နှစ်နေ၊ ဈေးတက်ရင်ရောင်း အမြန်သဌေးဖြစ်တဲ့နည်းပေါ့။

--------

အထက်မှာပြောခဲ့တဲ့နည်းနဲ့ ချမ်းသာသွားကြသူတွေလဲ မနည်းပါဘူး။ ၂၀၀၇ လောက်အထိပေါ့။ ၂၀၀၇ နှစ်ဆန်းလောက်ကစပြီး အိမ်ဈေးတွေ ကျဆင်းလာပါတယ်။ အိမ်ကိုမြတ်ရင် ရောင်းမယ်ဆိုပြီး ၀ယ်ထားတဲ့သူတွေလဲ - အိမ်ဈေးကျတော့ဘဏ်ကိုဆက်ပြီး အကြွေးမဆပ်တော့ဘူးပေါ့။ ဒီလိုလူတွေအများကြီးကို ပိုက်ဆံချေးထားတဲ့ဘဏ်တွေလည်း မျက်ဖြူစိုက်ချိန်ရောက်ပြီလေ။


ဆက်ရေးသွားပါဦးမယ် -